Nunatsinni nukittunerpaaq Europamiunut unammillerumallerpoq
Nuummi timersortarfissuaq Inussivik arfininngorneq ualilluaraa tamaviaarpalaarfiullualaavippoq.
Tassanimi Nunatsinni nukittunerpaatut taaguut unammissutigalugu peqataasut qulingiluat tamaviaarput.
Unammeriaatsini sisamaasuni pointit katinneqarmata Nikolaj Joensen Nuummeersoq ajugaavoq Taatsiaq Gabrielsen Ilulissaneersoq tullersortaasoq Nukappiannguaq Vetterlain Nuummeersoq pingajuattut inissippoq.
- Anguniartuarsimasara tassa piviusunngorpoq, Nikolaj Joensen pimoorullugu oqimaatsulerinermik 2014-miit aallussisoq oqarpoq.
Ajugaasarnerit
Unammeriatsit sisamaasut nukittoqatigiiaat marlukkaarlutik imminnut toqqaannaq unammisarlutik naammassivaat. Piffissaq atorneqartoq kivitsinerillu kisinneqareerneranni pointit inissinneqartarput.
- Unammineq sioqqullugu anguniagarivara unammeriaatsini tamaginni ajugaasuunnissara. Imaassinnaavoq mikinersaasunga kisianni qularutigineqassanngilaq kina nukittunersaanersoq, Nikolaj Joensen oqarpoq.
Ukiut arlallit Greenland Strongestimi ajugaasuusarpoq 90 kilo ataallugu oqimaassusilinni ajugaaneq aallarniutaalluni. Siorna 105 kilo ataallugu oqimaassusilinni ajugaasuuvoq aamma ukioq manna oqimaassutsimi tassani Danmarkimi pissartanngoreerluni maanna Nunatsinni nukittunerpaatut imminut taasinnaanngorpoq.
- Danmarkimi aappaagu pissartanngoqqeriassaanga aammalu Kim Ujarak Lorentzen ajoquseqqajunnaarpat toqqaannaq unamminissaanut qilanaarlunga, Nikolaj Joensen oqarpoq.
- Aamma Europami 105 kilo ataallugu oqimaassusillit nukittuneqqusaanerat angorusuppara. Taamaattumik 105 kilomit oqimaannerulinnginnissara nakkutigisariaqarpara, Nikolaj Joensen oqarpoq.