Nunatsinni NGO-tut suleqatigiit Inatsisartuni amerlanerussuteqartunut kajumissaaruteqarput
NGO-t suleqatigiit ilaatigut tassaasut ICC, KNAPK, Avataq aamma Transparency Greenland, aqagu aalajangiisoqarnissaa sioqqullugu suliariaaserineqartoq "qanoq iliunnginnissamut paatsuugassanngitsumik assersuutissaalluartutut" taavaat.
Innutaasut ilarpassui, aammalumi suliniaqatigiiffiit aalajangiisoqartinnagu naammaginartumik peqataatinneqarsimannginnertik Naalakkersuisunut erseqqissaatigisimavaat, naak aalajangiineq kinguaariinnut tullernut annertuumik sunniuteqartussaasoq.
Tamanna partiit naalakkersuisuutitaqartut qineqqusaaramik ammasumik ingerlatsinissamik innuttaasunillu peqataatitsinissamik neriorsuutaannut naapertuutinngilaq, NGO-t suliniaqatigiit taama isumaqarput.
Paasissutissat aqagu taasissutigineqartussamut toqqammaviginiarneqartut naammaqqajaratillu innuttaasunut politikerinullu paasinartunngorlugit suliaralugit ingerlateqqinneqarsimanngitsut aamma oqaatigaat.
Tamannalu pissutigalugu NGO-t suleqatigiit Naalakkersuisunut ima kajumissaaruteqarput:
- Taasissutigineqarnissaa kinguartinneqarli, paasissutissiissutigineqarnissaalu aallartinneqarluni, taamaaliornikkummi innuttaasut politikerillu naammattumik ilisimasaqarlutik aalajangiiffigissaq pingaarutilik aalajangiiffigisinnaassavaat.
NGO-t innuttaasunik peqataatsitsinerusoqarnissaanik suliniaqatigiit isumaaat malillugu, aqagu taasissutigineqartussaq naammattumik ilisimasaqarfigineqarani pisussaavoq