Nunatsinni misilittakkat Canadamiut soqutigaat
Tikeraat tassaapput ilisimatooq imaanilu uumassusilinnik ilisimasaqarluartoq Marcel Babin Canadamiut misissuivianni Canadian Excellence Research Chair-imeersoq taassumalu suleqatai Quebec-imi universitetimeersut. Taakku Pinngortitaleriffillu suleqatigiissutigisinnaasatik misissuataariartorlugit Nuummiipput. Suleqatigiissutaasinnaasullu ilagaat uuttuinermi Nuummi atortorissaarutit nutaat.
Taakku atorlugit uuttorneqarsinnaapput immap taratsumik qanoq akoqartiginera, kissassusaa aammalu immap iluani qaamaneq. Ullumikkummi ajornartorsiutaasarput uuttuinermi paasisat qaammataasatigut nassiunneqartariaqartarnerat. Uuttuutit sikumit ilulissanillu aserorneqarsinnaapput puttallarlutik nassitsiniarnerminni. Taamaammat misileraaffigineqarpoq uuttutit namminneerlutik misissuisinnaalernissaat puttallarfiusussaq sikoqarnersoq iluliaqarnersorluunniit.
Uuttuutit isumannaatsumik ingerlalersinnaappata siunertaavoq ukioq kaajallallugu avinngarusimagaluartuni silaannaap allanngornerata nassataasa nalunaarsornissaat.
Suleqatigiissutigineqarsinnaasutut eqqartorneqartut ilagaat Baffinip kangerliumarngani uuttuutini inissiisinnaaneq. Taakku atorlugit paasiniarneqarpoq uuliasiornermi nipiliortut arferit ingerlaarnerannut akornutaanersoq.
