Nunatsinni Inuit Innarluutillit Kattuffiat suliffeqarfitsialammik nersornaasiisoq

Nunarsuaq tamakkerlugu innarluutillit ippassaq ulloraat, tassunga tunngatillugu Nunatsinni Inuit Innarluutillit Kattuffiata suliffeqarfitsialammik Nuummi Inussivimmi ippassaq marlunngornermi nersornaasiipput.

Nersornaasiineq aatsaat siullermeerluni pivoq, tassanilu Pinngortitaleriffik suliffeqarfitsialattut nersornaaserneqarpoq.

Suliffeqarfillu nersorniarneqartoq pillugu, Nunatsinni Inuit Innarluutillit Kattuffiata siuliuttaasuata Viggo Johansen ilaatigut ima tunngavilersuivoq.

- Innarluutilik sulisorineqartoq, paarilluarneqarpoq isumagilluarneqarpoq, suliffeqarfiullu iluani peqataatilluarneqarpoq, taanna oqarpoq.

Akunnerit suliffiusut amerlinissaat kissaatigigaa

Innarluutilik sulisorineqartoq Nina Kleist Pinngortitaleriffimmi aalisakkat misissorneqarnikut ukiuni tallimanngulersuni nalunaarsortarpai.

- Oqimaassussaat, angissusaat aamma soorlu sissiisa angissusaat misissoreeraangamikkit allattukkatik Pinngortitaleriffimmukaattarpaat, taava paasissutissat katersugaat qarasaasiamut nuullugit nalunaarsortarpakka, Nina Kleist oqarpoq.

Nina Kleistillu sulisarnini nuannarilluaramiuk ullup affaanna sulisaraluarluni akunnerit suliffiusut sivitsorneqarnissaat kissaatigaa, nammineerlunilu ullormut akunnerit tallimat arfinillillu tikillugit sulisalernini nuannaarutigalugu oqaluttuarpoq.

Suliarisartakkanilu allaniit nuannarinerunerarpai.

- Suliakka taakku nuannarineruakka, allat laboratioriummimiittut pikkunaangilaarneruakka kisianni misissuinerit inerneri qarasaasiamut nussorlugit nalunaarsuillunga nuannarinerua, taanna oqarpoq.

Assassukkanik aamma saqqummersitsisut

Nersornaasiiginnartoqanngilarli ullorsiortummi aamma assassukkaminnik saqqummersitsipput. Saqqummersitsisunullu ilaavoq Georg Josvassen nammineerlunilu qilaatersortarami, qilaasiaminik saqqummersitsivoq.

- Sananikuuara qilaat, meeraallungali qilaatersortartuuneq nuannarigakku, qilaatersortartunik aamma siuleqarama, taanna oqarpoq.

Innarluutillit ullorsiornerat malunnartinniarlugu innarluutillit pizzatuullutillu illulerlugu najoqqaaqatigiipput.

Nunatsinni Inuit Innarluutillit Kattuffiata ukioq manna misiliutitut marloriarluni nersornaasiivoq, innarluutillit sapaatit akunneqarnerani Anja Hynne Nielsen siullertut nersornaaserneqarluni.