Nunatsinni autismemik nappaatillit ataatsimoorussamik oqaaseqarsinnaalertut
![Direktør for Greenland Holding A/S og Greenland Venture A/S](/sites/default/files/styles/image_934x467/public/article_images/img_1144_2.jpg?itok=9yzBJBFN)
Inoqatinut attaveqarniarnermik ajornakusoortitsisunik, imaluunniit autismemik nappaatilinnut, meerallit ulluinnarni unammilligassarpassuaqartartut, arlaqartullu Nunarput qimattaraat, peqatigiiffiup tusagassiuutinut nalunaarummi allaaseraa.
Peqatigiiffimmi siulittaasunngorlaap, Karsten Høyip infantil autismertumik 14-inik ukiulimmik erneqarami unammilligassat suunersut nalunngilai. Tamannalu pissutigalugu peqatigiiffimmi siulittaasunngornissani aalajangersimavaa.
Aamma atuaruk Innarluutilimmik meeraqarneq imaannaanngitsoq
- Nuummi angajoqqaat peqatigiiffiat aqqutigalugu assigiinngitsutigullu oqaloqateqartarninnit atugassarititaasut ukiut ingerlanerini pitsanngoriarsimagaluarlutik suli pitsaanerpaajunngitsut paasivara. Nunatsinni autistinut immikkoortortaqarfimmik pilersitsinermi sinaakkutinik, oqalliffinnik, autistit ilaqutaasalu atugarisaminnik anguniakkaminnillu oqariartortarfissaannik pilersitseqataassallunga kissaatigaara, Karsten Høy tusagassiuutinut nalunaarummi oqarpoq.
Aamma atuaruk Autismeqartut inuiaqatigiinninngaanniit paasineqarnerunissaat MIO-p ujartorpaa
Ataasiakkaat inuuneranni naleqartitsinerulernissaq, ilaqutariit akornanni ulluinnarni atugarissaarnerulernissaat meeqqallu inoqatinut attaveqarniarnermik ajornakusoortitsisut ilinniagaqarnissamik periarfissaqalernissaat anguniarneqartoq, Høyip, ulluinnarni Greenland Holdingimi pisortaasup oqaluttuaraa.
Peqatigiiffiup inoqatinut attaveqarniarnermik ajornakusoortitsineq pillugu aappaagu sapaatit akunnerani 11-mi ataatsimiinnissaq maanna sulissutigaa.