Nunatsinni innuttaasut SIK-mit ataatsimeeqatiserineqartut

Sulisartut Kattuffeqarnerata juulip aallaqqaataani 60-inngortorsiorneqarnera malunnartinniarlugu SIK tassunga atatillugu aaqqissuussaqarpoq, Nunallu Avannarliit isumassarsiffigalugit Inunnik Qassimiuaartitsisoqassaaq, tassa qanga, maannakkut, siunissarlu aallaavigalugit demokratii, ataatsimoorneq, inuit SIK juulip aallaqqaataani malunnartinniarpaa:

- Isumaqarpugut inuit naapittarnerat tunngaviulluinnartuusoq, aammalu isumaqarluta inuuneq sorpassuartigut tassaasoq naapitagut peqatigalugit pilersitseqatigiiffissarput, SIK-p siulittaasua Jess G. Berthelsen oqarpoq, nangillunilu:

- Taamaattumik ataatsimoorneq nukittorsarniarlugu aaqqissuussivigut, kikkulluunniit naapiffigisinnaasaannik. Pissutigalugu isumaqaratta oqaloqatigiinneq oqallinnerlu tassaasut tamatta siunissatsinnik nukittorsaataasussat, SIK-p siulittaasua oqarpoq.

Qassimiuaartitsinerup nalaani qitiutinneqartussat tassaapput politikimut, inuussutissarsiornermut, isumaginninnermut kulturimullu tunngasut, soorlu aamma Nunani Avannarlerni Atlantikullu Avannaani sumiinneq apeqqutaatinnagu illugiilluni oqallinneq,attaveqatigiinneq suleqatigiissutissanillu nutaanik pilersitsinissat pingaartinniarneqartut.

Atajuartumik annertusiartortitsineq, ilinniartitaaneq suliffissaqarnerlu, takornariaqarneq, aatsitassat aalisarnermilu inuussutissarsiutit immikkut qitiutinneqarnerat Qassimiuaarneq 2016-imi siunertaasut, SIK-p tusagassiuutinut nalunaarummi aamma allaaseraa.

Aaqqissuussineq Nuummi Inussivimmi pissaaq, isernerlu akeqassanngilaq.