Nunatsinni ilisimatusarnissaq tapiiffigineqarujussuartoq
Nunat tamalaat Issittumut ukiorititaannut Danmark 60 mio. koruuninik aningaasaleeqqinniarpoq. Taamalu aningaasaliiniarneq Danmarkimi naalakkersuisut Dansk Folkepartiillu isumaqatigiissuteqarnerisigut pisussanngorpoq.
Aningaasaleeqqinnissarlu tamanna nunarput sinnerlugu Issittumi ukiorititamut komité-p nuannaajallaatigeqaa, siulittaasuat Birger Poppel ima unnersiorpoq:
- Aningaasaleeqqittoqartussanngornera nuannaarutigeqaarput apeqqutaaginnarporlu aningaasat sumut atussanerivut, Birger Poppel oqarpoq.
Kalaallit Nunaanni pingaarutillit ilisimatusarfigisassat arlaqarput, tamarmillu ataatsikkut ilisimatusarfigineqarsinnaanngillat.
Ilaatigut soorlu silaannaap allanngoriartornera kiisalu mingutsitsinerujussuaq nunani allani soqutigineqartaqaat.
Nunatsinniilli immikkut isigisarialittut ilisimatusarfigissallugu sunarpiaq soqutinartutut taaneqarsinnaava?
- Kalaallit Nunaanni soqutigineqartutut immikkullu ilisimatusarfigisassatut soqutigisarialittut taasinnaasoraakka, ajornartorsiutit aalajangersimasut, immikkuullarissusillit soorlu inuit peqqinnissaannut tunngassuteqartut. Ilaatigut soorlu inuiaqatigiit akornganni nakorsaatit, inuiaqatigiit inooqatigiinnerisa ilisimatusarfigineqarnissaat, inuiaqatigiinni atukkat, ineriartorneq minnerunngitsumillu aningaasarsiornikkut inuussutissarsiornikkullu ineriartorneq, Birger Poppel oqarpoq.
Aningaasat tapiissutigineqartussat nunatsinni ilisimatusarneq pillugu komite-p aningaasat ilisimatusarnermut qanoq ittumut atorneqarnissaat aalajangiivigisussaavaat, Birger Poppelilu aperaarput Kalaallit Nunaannut aningaasaliissutit sunniuteqartinneqassanersut
- Ilaanaarujussuaq… Kalaallit Nunaanni ilisimatusarnermut misissuinermi kommissioni Danmarkimilu ilisimatusartut suleqatigiilluinnartuupput, taamaattumillu avammut assigiimmik sunniuteqartarlutik, Birger Poppel oqarpoq.
Nunat tamalaat Issittumut ukioritaat marsimi aallartikkuni 2009-p tungaanut ingerlanneqassaaq.
Danmarkip aningaasaleeqqinneratigut maanna katillugit issittumi ilisimatusarnermut aningaasat atugassat 76 mio koruuninngorput.
Taamatuttaaq ilisimatusarnermut ministeeriaqarfik 40 mio. koruuninik issittumi ilisimatusarnermut atugassanik piffissami tassanerpiaq atorneqartussanik immikkoortitsivoq, taamaalillunilu nunatsinni ilisimatusarnermi aningaasat atugassat 400 mio. koruuninngorput.
