Nunatsinni ilisimasassarsiorneq ingerlalluartoq
Geocenter Møns Klintimeesut dinosaurusit pillugit Nunatta kangiani ilisimassarsiornerat ingerlalluarpoq. Sapaatip akunnera sinnilaarlugu ilisimassarsioreerlutik saanikunik ilimagisamit amerlanerusunik nassaarput.
Geocenterimit 2012-imi ilisimasassarsioriartortoqaqqaarpoq, tassanilu phytosaurusit - kuukooriarsuarnut assingusut - sisamat dinosaurusillu qaasuttup ataatsip saarngi ukiut 200 millionit missaannik pisoqaatigisut tupaallannartumik nassaarineqarlutik.
Maannakkut ilisimasassarsiornemi dinosaurusit taakku marluk saarnginik allanik nassaartoqarpoq, Geocenter Mønsip dinosaurusinik saqqummersitaani allanik asseqanngitsumi taamaalillutik phytosaurusip saarnginik tamakkiinerusunik ukiup tulliani saqqummersitsisinnaanngorput.
Ilisimassarsiortullu ilimagisamit nassaanik amerlanerusunik maanna angerlaassisussaarpasilersut, ilisimassarsiornermik ingerlatsisoq Jesper Milan, nutaarsiassaqartitsivimmut Dagbladet Sjællandskemut qaammataasiaq atorlugu attaveqarnermi oqarpoq.
- Ujaariartukkatsinnik nassaarpugut, assaaffitsinnilu allamik aamma assatassaqartoq paasivarput. Saanikorpassuarnillu allanik aamma nassaarluta.
- Nassaarisarput nutaaq, dinosaurusimut qaasuttumut allamut assingusinnaavoq, Jesper Milan oqarpoq.
Nunatta kangiata nunataani ukioq manna ilisimasassarsiornerminni uumasunit allanit sinnikunik aamma nassaarsimallutik, taassuma aamma oqaatigaa.
- Salamandarerujussuaq meterimik angissusilik, aalisagarpassuillu ilaatigut nassaaraagut, ilisimassarsiornermi ingerlatsisoq nuannaaqaluni oqaluttuarpoq, neriuutigaalu nassaartorluariarunik aappaagu ilisimassarsioriartorlutik Jameson Landimut uteqqikkumaarlutik.