Nunatsinni frimærkini 2008-imi kusagineqarnerpaaq
Frimærkit Post Greenlandip siorna saqqummersitai 19-it akornanni eqqumiitsuliortup Bodil Buuti Pedersernip assilialiaa kusanarnerpaatut toqqarneqarpoq, assilialiami nanoq eqqissivilluni seqinnisaartoq assilialiarineqarpoq, tusagassiuutinullu nalunaarummi allassimasoq malillugu imaassinnaavoq nanoq sinittoq imaluunniit piaralik.
Buutip assilialiaa Frimærkinngorlugu siorna 2008-imi januaarip 31-anni saqqummersinneqarpoq 14 koruunit 25 oorinillu naleqarluni.
Frimærkit siorna saqqummersinneqartut akornanni kusanarnerpaat aappaattut toqqarneqarpoq kigartuilluni eqqumiitsuliortup Yves Beuaujardip assilialiaa.
Tassani Illoqqortoormiuni franskit radioaqarfigisimasaat assilialiarisimavaa.
Frimærkip suliarineqarnera stålstik atorlugu frimærkeliorneq qangatut ingerlanneqartoq suli nuannarineqaqisoq atorneqarmat, tamannalu nunarsuarmi tamarmik katersisartunit nuannarineqaqisunut ilaavoq.
