Nunatsinni eqqartuussisoqarfinnik aaqqissuusseqqittoqalerpoq
Eqqartuussisut arlallit eqqartuussisoqarfimmi kisimiittarnertik suleqatiminnillu siunnersorneqarsinnaannginnertik imaluunniit suliatik pillugit oqaloqateqarsinnaannginnertik ullumikkut ajornartorsiutigisarpaat. Tamanna Nunatsinni eqqartuussisut qangali erseqqissaateqarfigisarpaat, kissaataallu maanna piviusunngortinneqartussanngorpoq.
Eqqartuussisoqarfiit sisamaasut Nunatsinni kommunit sisamaasut malissavaat, 2013-illu ingerlanerani Nuummi, Sisimiuni, Ilulissani Qaqortumilu eqqartuussisoqarfinni ininik nutaanik piffissamullu naleqquttunik pilersitsisoqarumaarpoq.
-Ernumanissamut pissutissaqanngilaq. Eqqartuussivinnik atuisut allannguutaasut annertunerusumik maluginavianngilaat. Innuttasut nunatsinni eqqartuussisoqarfiit illuutaanit sullinneqarnerat killilimmik suli ingerlassaaq. Aallaqqaammut eqqartuussisoqarfiit iluini allanngortiterinerit ingerlanneqaqqaartussaassapput, Nunatta Eqqartuussiviani eqqartuussisoq Birgit Skriver oqaluttuarpoq.
