Nunatsinni biilertarnermut inatsit folketingimi siullermeerpaat

- Ataatsimut isigalugu naammagisimaarlugu oqaatigisariaqarpara, tassami biilinik angallanneq pillugu inatsisip kingullermik iluarsaanneqarnera 1992-mioqqooqaaq pivoq. Taamanimiillu pissutsit allanngorsimapput tassami ilaatigut illoqarfiit ilaanni angallanneq annerulersimammat, Lars-Emil Johansen oqarpoq.

Nangipporlu:

- Soorlu imigassartorsimallutik biilertut killissarisaat 0,8 promille-minngaanniit 0,5-imut appartinneqartoq aamma biilerluni oqarasuaatinik oqalunnerup inerteqqutaanera. Aammalu biilertut qitequtiminnik atuinissaasa piumasarineqarnera taavalu aamma snescooterit pillugit malittarisassaqalernissaa pillugu oqallinnerup ataatsimut isigalugu naammagisimaarlugu oqaatigaara, oqarpoq.

Tamakkuli tamarmik anguneqassappata Lars-Emil Johansen isumaqarpoq Kalaallit Nunaanni politiit amerlineqartariaqartut.

- Inatsisit malinneqarnerannik nakkutilliisussat politiit naammattut pigisariaqarpavut, taamaattumik justitministerimut oqaatigaara politiinik amerlanerusunik pissarsinissaq aqqutissiuutissallugu. Justitministeri imatut neriorsuinngikkaluarluni oqarpoq tamanna oqalliseqataaffigilluarsinnaagini, taama oqarpoq folketingimi ilaasortaq Lars-Emil Johansen.

Taassuma folketingimi uparuaatigisaata aapparaa snescooterersinnaanermi 18-inik ukioqalereersimanissamik piumasaqartoqarnera.

Lars-Emil Johansenimi isumaqarpoq inatsisitigut taamatut piumasaqartoqassappat taava assersuutigalugu savaateqarfinni piniartoqarfinnilu inatsit saneqqunneqartussanngussasoq, tassami taakkunani najugallit 18-t ataallugit ukioqaraluarlutik ikiuunnerminni snescooterit atortamatigik. Tamannalu danskit inatsiseqarnermik ministeriannit akuersaarneqartoq unnerpaa.

Nunatsinni biilinik angallannerup nutaamik inatsisiliuunneqarnera aasartinnagu folketingimi naammassissangatinneqarpoq naatsorsuutigineqarporlu oktoberimi inatsisip atuutilersinneqarnissaa.