Nunatsinni aviisit ingerlalluarnerulaalerput

Ukiut aviisinut ilugersunartorsiorfiusut atuunneranni Nunatsinni aviisit marluk, Sermitsiaq Atuagagdliutillu kattuttariaqalersimapput. Tamatumalu kingorna 2011 SermitsiaqAG-ip sinneqartooruteqarluni anigorpaa 3.142.000 koruuninik sinneqartoorluni.
Allattoq Apollo Jeremiassen
marsip 01-at 2012 04:38

- Aviisit marluusut kattunneri iluaqutaasimavoq taamaalilluni Nunatsinni tusagassiisarneq pituttorsimanngitsoq arlaannaannulluunniillu attuumassuteqanngitsoq attatiinnarneqarsinnaalersimalluni, SermitsiaqAG nalunaarpoq.

Sinneqartoorneq ilaatigut pissuteqarpoq aviisit Danmarkimi naqinneqartalermata, taamaalilluni siunissami aqqusaagassat unammillernartut oqinnerulersutullusooq isikkoqalersimallutik.

Aviisit kattunnerisa kingorna taakku nittartagaat takuniarneqarnerpaanngorsimammat nuannaarutissanut ilaasoq, Sermitsiaq-AG allappoq.

Siorna 2011-mi aviisit naqinneqartut 2010-mut sanilliullugit ikinnerulersimapput, tamannalu nunani allani aamma atugaavoq.

Nunatsinni aviisini ussassaarutit naqinneqartartut eqqarsaatigalugit, siorna 2011-mi tamanna million koruunit missaannik annertuseriarsimavoq, naak sulisussarsiornernut pilerisaarutit ikilisimagaluartut.

SermitsiaqAG-ip sinneqartoorutaa akileraarut ilanngaatigereerlugu 377.000 koruuniuvoq, siornaak 2010-mi 189.000 koruuniinnaasoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq