Nunatsinni assilisat Monacomi saqqummersinneqarput
Assit saqqummersinneqartut franskinit qajartortartunit marlunnit, Alain aamma Nathalie Antognelli-mit assilisaapput, taakku siorna aasaq mannalu Upernavimmiit Nuummut isorartuumi qajartorput.
Taakku assilisat saqqummersitaat Monacomi immamik ilisimatusarnermut katersugaasivimmi saqqummersinneqarput. Tassanilu Nunatsinnik soqutiginnilluartup Prins Albertip aappaata saqqummersitsineq, tamaani tusagassiorfinnit malinnaaffigineqarluartumik ammarpaa.
Nunatsinni takornariaqarnermi inuutissarsiornermilu siunnersuisoqatigiit taama ilisimatitsipput.
- Alain aamma Nathalie septembarimi maaniikkamik, qaannamik ilisimasassarsiornertik oqaluttuaraat. Upernavimmiit kujammut ingerlaarnerminni nunaqarfiit illoqarfiillu tamangajaasa aqqusaarsimavaat innuttaasullu naapillugit, tamakkunanilu assilisaat nalissaqanngillat, Malik Milfeldt GTE-mi attaveqatigiinnermut siunnersorti oqarpoq.
- Takornariat taamatut misigisassarsiortartut, GTE-mit ukiuni tulliuttuni aallunneqarnerulerniarput. Kalaallit Nunaata misigisassarsiorfissatut nunarsuatsinni pitsaanerpaanut ilaanera nittarsaatissavarput, Malik Milfeldt oqarpoq.
"Inuiaqatigiinnut kalaallinut tusarnaarneq" saqqummersitsinerup taaguutigaa, Monacomilu katersugaasivimmi januaarip pingajuata tungaanut takutinneqassalluni.