Nunatsinni assilisaq nunarsuaq tamakkerlugu uitsatigineqartoq
- Assut pikkunarpoq, DMI-mi sulisoq, Qaanaap eqqaaniinnermini assilisami nunarsuaq tamakkerlugu uitsatigineqarnera pillugu taama oqarpoq.
Qimussit putsinnikkoortunik sikukkut ingerlaartut assilineqarnerat nunarsuaq tamakkerlugu uitsatigineqarpoq.
Silap pissusianik ilisimatusartoq Steffen M. Olsen DMI-meersoq assiliisuuvoq, assilisanilu Twitterikkut juunip 14-iani saqqummersippaa.
Assilisaalu kingorna uitsatigineqangaatsiarpoq.
DMI Danmarkimi tusagassiorfiit amerlanersaannit saaffigineqarpoq. Aammali nunani tamalaani tusagassiorfissuit saaffiginnissimapput, ilaatigut BBC, CNN, The Guardian, Der Spiegel aamma National Geographic.
- Sulinitsinni ajornartorsiulernerput uppernarsarniarsarivara, migisaralugu upperiuminaatseqaara, mobilinnilli assilisama taama uitsatigineqartiginissaa ilimaginngikkaluarpara, Steffen M. Olsen oqarpoq.
- Assut pikkunarpoq, aammali ernumalersitsivoq, assilisarami assigiinngitsorpassuarnik nassuiaaserneqarsinnaavoq. Ajunngitsumilli saqqummiunneqarsorivara.
DMI asseq pillugu itisiliisinniarlugu assillu atornissaanut akuersissummik piniarfiginiarlugu tusagassiorfinniinnaq saaffigineqanngilaq.
Aamma Al Gorep allattoqarfianeersoq asseq atorumallugu saaffiginnissimavoq.
Al Gore USA-mi Demokraatit tunuliaqutaralugit præsidentimut qinersinermi siornatigut sassartinneqarsimavoq silallu pissusia pillugu maanna suliniuteqartuulluni.
Assip allanngortitigaannginnera qulakkeerniarlugu aamma saaffiginnittoqarsimavoq, taamaattoqannginnerali DMI-mit naqissuserneqarpoq.
Steffen M. Olsen Qaanaap eqqaani juunip 13-iani assiliivoq.
Qaanaami sapaatit akunnerata siuliani 17,3 gradit angullugit kiappoq. Taamali kiatsigisimanera uppernarsaqqaarneqartuussaavoq.
- Ullormi ataatsimi assilisaq ataasiinnavik tunngavigalugu inerniliisoqarsinnaanngilaq, takutinneqarsinnaavorli. Taama pisoqarnera uannut assut ingasappoq, sumiiffimmili ataasiinnarmi taama pisoqarpoq, nunarsuarmut tamarmut tunngatinneqarsinnaanngilaq.
- Pissutsilli qanoq ilungersunartigisinnaanerinik sumiiffiullu qanoq angallavigiuminaatsigineranik takutitsivoq. Ulloq taanna toqqissisimanngilagut. Ulloq nalinginnaasuunngilaq, Steffen M. Olsen oqarpoq.
Ilisimatusartup DMI-meersup aamma oqaatigaa siku ikaarfigisartik kilometerinik arfineq-pingasunik isorartutigisoq tamarmi qarsutsineqartoq aqqutigisartillu itisiartuinnarsimavoq. Taamaammat itinersaaffia avaqqullugu ingerlasariaqarsimapput.
DMI's klimaforsker @SteffenMalskaer er i disse dage NV-Grønland for i samarbejde med lokale fangere at hente vejr- og havmålere, og endte med at dokumentere ekstreme forhold på en usædvanlig varm dag, hvor smeltevandet bogstaveligt talt flød på isen. pic.twitter.com/vmYBxyhiWr
— DMI (@dmidk) 17. juni 2019
