Nunatsinni arsaattarneq FIFAp tapiiffigaa
Anguniagaq tassaavoq tunngaviusumik arsaannermik ilinniarfissami 2012-miit 2015-p tungaanut pilersaarusioqqaarnissaq. Eqqarsaatersuutillu malillugit nunatsinni klubbit inuillu tunniussaqarsinnaasut meeqqat assigiinngitsutigut arsalerinissaat pilersaarusiortassavaat, aaqqissuuttarlugu kiisalu piviusunngortittassallugu.
FIFA-miit aningaasaliiffigitinniaraanni pilersaarusioqqaartariaqassaaq, tassanilu oqartussaqarfiit assigiinngitsut, soorlu kommunit Namminersorlutillu Oqartussat aamma aningaasaleeqataarusunnissaat pisariaqassalluni.
Kommunit sumiiffinnilu klubbit pitsaasumik suleqatigilluarnissaat qulakkeerumallugu GBUp siulittaasua Lars Lundblad kiisalu siulittaasup tullia John Thorsen paarlakaajaallutik Jens Tang Olesen arsaattartut kattuffianni pilersaarusiornermik qullersaasoq januarip naalerneraniit februarip qeqqata tungaanut angalaqatigissavaat, uku illoqarfiit arfinillit tikeraarneqassallutik: Sisimiut, Ilulissat, Aasiaat, Tasiilaq, Uummannaq kiisalu Nuuk.
Sumiiffinni arsaattartut klubbiisa sinniisui kiisalu politikerit atorfilittaalu tamaani kultoorimut sunngiffimmilu sammisassaqartitsinermi aallutaqartuusut angalanerup nalaani GBU-rmiut ataatsimeeqatigisassavaat.
Illoqarfinni nunaqarfinnilu arsaannermik ilinniarfinnik pilersitsinissaq, atuarfinni arsaannermik sammisaqartitsinermik ingerlatsisarnerit kiisalu FIFAp arsaannermik festivalertitsisarneri ataatsimiinnerit nalaani eqqartorneqartassapput.
Tamatuma saniatigut arsaattartut trænerissatut ilinniarnerit, dommerissatut ilinniarnerit, kiisalu qullersassatut ilinniartitaanerit sukumiisumik sammineqarnerisapput.
