Nunatsinni aningaaseriviit ernumananngillat
Illunik tuniniaanermi aningaasanik iluanaarniarsarisunik Kalaallit Nunaanni takussaasoqanngimmat, bankit nunatsinneersut aningaasaqarniarnikkut ajornartorsiulersinnaanissaat, GA-p pisortaata Henrik Lethip ilimaginngilaa.
Taamatut oqariartuuteqarnermigut Grønlandsbankip pisortaata Martin Kviesgaardip ullaaq manna radioavsiisimi oqaasii tapersersorpai.
Grønlandsbankip piginneqatigiissutaasa qaammatip ataatsip ingerlanerinnaani 24 procentinik nalikillisimanerannut atatillugu Kalaallit Nunaata eqqornerlugaanissaa ilimaginngikkini, Martin Kviesgaardip oqaatigaa.
- Piginneqatigiissutivut qaammatip ataatsip ingerlanerani nalikilleriarsimasut nassuerutigisinnaavara, erseqqissaatigerusupparali aningaasaqarniarnitsinnut annertunerusumik malunnaateqarnavianngimmat, tassami akiliisinnaassuseqaratta, Martin Kviesgaard ullaap tungaa radioaviisimut oqarpoq, nangipporlu:
- Illumik pisinissamut taarsigassarsisitsinermut atatillugu erniat Grønlandsbankimi atuutsinneqartut allatut isikkoqarput, aalajangersimasumik erniaqartinneqaramik. Aalajangersimasumik erniaqartitsineq aalaakkaanerusumik aningaasaqarniarnitsinnut sunnniuteqartussaammat, Grønlandsbankip pisortaa Martin Kviesgaard oqarpoq.
Bankit minnerit Danmarkimiittut arlaqartut aningaasaqarniarnermikkut piffissami kingullermi eqqorneqarnerlupput.
Roskilde Bank assersuutissaqqippoq, bankip taassuma aktiaatai 69 procentit qaangerlugit nalikilleriarsimammata, Grønlandsbankip piginneqatigiissutai 24 procentimik nalikilleriartut.
