Nunatsinni aningaasaqarneq ajunngilaq

Nunatsinni aningaasarsiorneq ingerlalluarpoq immikkut misissuiffigilaaraanni 2007-imi aamma tamaatut ingerlanissaa ilimagineqarsinnaavoq. Taamaattorli nunatsinni aningaasarsiorneq pillugu statsministerimut siunnersuisartoqartigiit nalunaarusiaminni mianersoqqussutinik arlalinnik tikkuartuipput. Siunnersuisartoqatigiit siulittaasuat, ilisimatooq Christen Sørensen, ulluni makkunani nunatsinniippoq nalunaarusiaq pillugu oqalugiariartorluni. Oqalugiaataa ilaatigut innuttaasut atugarisaasa pitsanngorsarneqarnissaanik imaqarpoq.

- Aningaasaliinissarsuit eqqarsaatigalugit, assaat sulisussat naammannersut aperisariaqarpoq. Aamma minnerunngitsumik inuusuttut atuarnissaminnut piareersarluarneqartariaqarput, Christen sørensen oqarpoq nangillunilu:- Inuiaqatigiit akornanni ajornartorsiutit amerlapput, pingaaruteqarporlu meeqqap peroriartornermini toqqissisimalluni misigisimanissaa. Qanoq pisoqarumaarnera ernumassutigisussaanngilaat. Taannalu suliassani anginerpaatut taaneqarsinnaavoq. Aningaasanut inatsisissami aningaasaliisimaneq tassunga tunngatillugu naammannersoq apeqquserneqartariaqarpoq.

Naak raajanik avammut tunisassiornermut tunngatillugu akit pitsaanerpaanngikkaluartut, Kalaallit Nunaanni aningaasaqarneq ukiuni makkunani pitsaanera Christen Sørensen-ip tupigusuutigaa. Aningaasanut inatsisissami erngup nukissiorfiliortiternissat aammalu ilinniartitaanermut aningaasaliinerit salliutinneqarsimaneri Christen Sørensen-ip aamma nersualaarpai. Nangillunilu oqarpoq, inuiaqatigiit akornanni oqallisigineqarnerusariaqartoq, ilumut tamakkorpassuit angussallugit sulisussaqarnersoq, aammalu inuusuttut naatsorsuutigineqarnerat naammannersoq.

- Inuusuttut sulisorineqalernissaat anguniarlugu sanaartornermut allanullu suliassanut ilinniartinneqarnissaat pingaartinneqartariaqarpoq.

Proffesori Christen Sørensen, naggasiilluni oqarpoq, Kalaallit Nunaanni suliffiit tamarmik nunaqavissunit inuttaqalernissaat pingaartinneqartariaqartoq aammalu aningaasaqarnermut pingaaruteqarluinnarnerarpaa.