Nunatsinni aatsitassarsiorneq nunanit allamiunit soqutigineqarluartoq

Aatsitassanut ikummatissanullu pisortaqarfimmi atorfilittat ilaat aatsitassalerisut Canadami saqqummersitsinersuannut peqataaqqammerput.

Saqqummersitsinersuaq naatsunngorlugu PDAC-mik taaneqartartoq, nunarsuarmilu annersaajusoq, Canadami Torontomi ukiut tamaasa ingerlanneqartarpoq, saqqummersitsinersuarmilu peqataasarneq nunatsinnut akilersinnaalluarpoq, Aatsitassanut Ikummatissanullu pisortaqarfimmi immikkoortortaqarfimmi pisortaq Lars Lund Sørensen oqarpoq:

- Nunatsinni aatsitassarsiorniarlutik misissuisut aatsaat taama amerlatigipput. Saqqummersitsinersuarnut massumatut ittunut peqataasarneq Kalaallit Nunaannut akilersinnaalluarpoq, immikkoortortaqarfimmi pisortaq oqarpoq, nangillunillu:

- Aatsitassanut Ikummatissanullu pisortaqarfik nunatsinni aatsitassarsiortunik ilassinninniarluni saqqummersitsisoqarnerata nalaani aggersaasarpoq, nunatsinniittuinnarnillu aggersaaginnarani nunatsinnik soqutiginnittunik aamma aggersaasarluni. Nunatsinni aatsitassarsiornerup annertuninngortinneqarnissaa anguniagaavoq, Lars Lund Sørensen oqarpoq.

Saqqummersitsineq PDAC 1932-mi pilersinneqarpoq, 75-issaalu saqqummersitsisoqarluni.

Inuit 15.000-it ukioq manna peqataapput, saqqummiussinernut, oqallinnernut, workshop-inullu ilaatigut peqataasarlutik.