Nunatsinneersut aluminiliorfimmut tikeraarput

Nunatsinni aluminileriffimmik pilersitsinissaq eqqartorneqartuaannalersoq soorluuna piviusunngoriartulersoq. Islandimut paasisassarsiorluni angalaneq inuussutissarsiornermut naalakkersuisoq siuttoralugu ullumi aallartippoq. Siverth K. Heilmann aluminiumik aatsitsivissuaq Fjaardal Smelter Project ullaaq alakkareerlugu isumalluaammersimavoq.

Tassunga pulaarpugut ullaaq quliniit. Naalakkersuisunut ilaasortani kisimiippunga, taavalu atorfilittat saniatigut Nuup, Maniitsup aamma Sisimiut Kommunii aallartitaqarput, Nuummit kommunalbestyrelsemi ilaasortaq Ove Karl Berthelsen, Maniitsup borgmesteria Søren Lyberth aamma Sisimiut borgmesteriat Hermann Berthelsen, Siverth K. Heilmann nassuiaavoq.

Angalaneq aluminiumik aatsiterivissamik sananissamut nunatsinni eqqarsartoqarneranut tunngassuteqarpoq. Umiarsualiveqarfissamik, nunaminertap atorneqartussap angissusissai allallu paaserusunneqarput.

- Alumiiniliorfiup halitassaannai takullugit assorsuaq tupinnarpoq, naak allamik Braseliamiinninni takusaqareernikuugaluarlunga. Isalandip kangiatungaa qaqqaqarami, nunatsinnut assingusumik, taamaammat assorsuaq soqutiginarpoq, Inuussutissarsiutinut Naalakkersuisoq oqarpoq nangillunilu.

- Qularnanngiivissumik misissuineq nunatsinni aluminiliornermik aallartitsinissamut iluaqutaassaaq. Eqqarsaataavoq nunatta kitaani qeqqata tungaani, erngup nukiliornerata saniatigut aluminiumik aatsiterivissuarmik pilersitsinissaq – suliffippassuarnik pilersitsisinnaavoq nunatsinni siunissamilu iluaqutaalerumaarluni.

Inuussutissarsiornermut, Nunalerinermut Sulisoqarnermullu Naalakkersuisoq Siverth K. Heilmann taama oqarpoq. Angalaqatigiit sisamanngorneq ilanngullugu Islandimiissapput, angalanerallu Islandimi oqartussat aamma suliffeqarfissuaq Alcoa suleqatigalugu inuussutissarsiornermut Naalakkersuisoqarfimmit aaqqissuunneqarpoq.