Nunatsiavummi uranisiorsinnaaneq itigartitsissutigineqaqqalaarpoq

Akilinermi Nunatsiavummi inatsisartut uranisiornissaq pillugu taasimmata ukiuni tulliuttuni pingasuni uranisiorsinnaaneq itigartitsissutigineqaqqalaarpoq.
Allattoq Louise M. Kleemann
apriilip 11-at 2008 13:18

Nunatsiavummi avatangiisit illersornissaannut inatsisilioqqaarluni uranisiornerullu isumannaallisaafiigineqarnissaa misissorluaqqaarlugu uranisiortoqalernissaa naalakkersuisut siunnersuutigimmassuk, inatsisartuni ilaasortat arfineq pingasut naalakkersuisunut isumaqataapput, arfineq marluk maannangaaq uranisiornerup aallartinnissaa piumasarigaluaraat.

Taakku arfineq marluk ilaat, Keith Russell oqarpoq itigartitsineq uggoralugu, uranisiornermimi suliffissat iluatinnaraluarmata avataaniillu suleqatikkuminaatsutut isigineqalernissaq nuannarinnginnamiuk.

Nunatsiavummi Peqqinnissamut naalakkersuisoq, Greg Flowers oqarpoq inatsisit pisariaqartinneqartut atuutsilernissaannut ukiunik pingasunik piffissaqalernertik iluarisimaarini, CBC Newsimullu oqarluni; - Nunatta nammineq akisussaaffigilernissaa ukiuni 30-ni utaqqereeratsigu maanna piareernissatsinnut ilaat utaqqilaartariaqarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq