Nunatsiavummi ministerimik nutaamik qinersipput
Qinerneqartoq tassaavoq Maquuvimmiu arnaq, Kate Mitchell.
Taassuma akisussaaffigisassaasa ilagissavai, Nunatsiavummi ineqarniarnernut tunngasut aamma nunamik piginnittussaatitaanernut isumaqatigiissusiornissamik suliassat. Nunatsiavummi præsidenti Sarah Leo, Labrador Radio-mut taama oqarpoq.
Sarah Leo-p ilanngullugu oqaatigaa, Nunatsiavummi naalakkersuisut Paggivittamilu naggueqatitta inuit akornanni attaveqatigiittarnerit pitsaanerulernissaat anguniarlugu nammineq sulissuteqarniarluni.
Tamanna pillugu nittartakkami attaveqaataasussamik pilersitsivoq, inuit toqqaannarnerusumik sunilluunniit apeqquteqartarnissaat anguniarlugu.
Nunatsiami Paggivittamilu naggueqatigut inuit katillutik maanna 7.500-uupput.