Nunatsiavumiut nalliuttorsiortut

Naggueqatigiit Inuit Labradorimi Newfoundlandimilu tunngaviusumik inatsisaat ukiut aqqanillit matuma siorna, 2005-imi decembarip aallaqqaataani akuersissutigineqarpoq, Nunatsiavumilu namminersorlutik oqartussat naalakkersuisui taamaalillutik pilersinneqarlutik.

Ullorlu taanna Nunatsiavut tamakkerlugu, allanilu, malunnartinniarneqartarpoq.

New Foundlandimi St John’simi unnukkut immikkut ittumik nallittorsiortarput.

Nalliuttorsiornerit aallarnerlugit qullermik ikitsisoqartarpoq, kingorna qilaatersortoqarlunilu torlussortoqartarpoq erinarsoqatigiillu qatanngutigiinniat Hernnhutit tussiutitoqaaannik inuktitut erinarsortarlutik.

Aaqqissuisut ilaata, David Pottlep, Labrador Radiomut oqaatigaa meeqqat inuit pinnguaataannik aamma unammisinneqassasut naggataatigullu aamma aalisakkanik puisillu neqaanik tamanut nerersuartitsisoqassasoq.

Nunatsiavumiut Ottawami najugaqartut aamma assingusumik nalliuttorsiorniartut Pottlep oqaatigaa.