FN-ip qullersaa: Nunat tamalaat inatsisaannik Gazami unioqqutitsisoqartoq ersarippoq
![](/sites/default/files/styles/image_934x467/public/2023-10/20231020-105639-L-2844x2011ma.jpg?itok=9z3ou2Kz)
Naalagaaffiit Peqatigiit qullersaat António Guterres isumaqarpoq Israelip sakkutuuisa Hamasillu sorsuttartuisa akersuunnerminni inuinnaat illersussagaat. Tamanna pivoq Naalagaaffiit Peqatigiit Isumannaallisaaniaqatigiivi (FN's Sikkerhedsråd) marlunngornermi ataatsimiinneranni.
Reuters taama allaaserisaqarpoq.
Guterres siunnersuisoqaatigiinnut 15-inut oqalugiarnermini ima oqarpoq, "massakkorpiaq pisutut ittunik pisoqartillugu", ilisimasariaqarpoq sorsunneq malittarisassaqarmat - pingaarneq tassaalluni inuinnaat ataqqillugillu illersortariaqarnerat.
Naalagaaffiit Peqatigiit Isumannaallisaanermut Siunnersuisoqatigiivi marlunngornermi ataatsimiinnerminni Israelimi Gazamilu sapaatit akunneranni kingullerni pisut eqqartorpaat.
Hamasip sorsuttartui oktobarip arfineq-aappaanni Israelimut ilimasaareqqaaratik saassussipput, maannamullu israelimiut 1.500-t missaanniittut inuartariaqarsimasut nalunaarutigineqarpoq.
Israelip saassussinerit akillugit arlaleriarluni qaartartumeerereerpoq, palæstinamiullu peqqissutsimut ministeqarfiata nalunaarutigaa maannamut 5.000-it inuartarineqarsimasut - amerlanerpaartaat Gazami.
- Uani aamma nassuerutigineqassaaq Hamasip saassussineri tassanngaannaq pisuungimmata. Palæstinamimi innuttaasut ukiuni 56-ini tiguagaaqqanerminni ipianngutitaasimapput, Guterres marlunngormat oqarpoq.