Nunat siuarsagassat nerisassanik pilersornerminut pitsanngorssavigineqalerput
Christian Friis Bak ikiuiniaqatigiinni Folkekirkens Nødhjælpimi pisortap isumassarsiatsialaanerarpaa imatullu nangilluni:
- Atorfissaqartinneqaqaammi. Nunaatillit piitsut nunani piitsuniittut aningaasaliiffiginerisigut nerisassaqarniarnikkut ajornartorsiorneq iliuuseqarfigineqassaaq, maannami nerisassat akii qaffakkiartoqqilereermata, aamma piitsut pillugit ajornartorsiorneq silaannaallu allanngoriartornerata nassataanik ajornartorsiorneq aamma iliuuseqarfigineqassapput. Qiimmaallannarpoq isumassarsiatsialaallunilu.
Nunaatillit piitsut piitsuunerup akiorneqarneranut iluaqutaalluarsinnaapput, taakkumi nerisassanik pilersuilerpata nerisassat akii appartikkiartorneqalissapput tamannalu Afrikami kaattunut iluaqutaassaaq. Aamma silaannaap allanngoriartorneranik ajornartorsiutaasunut aaqqeeqataassapput, aap, taamaasiorneq isumassarsiatsialaavoq.
Nunat G8-mik taaneqartartut ukiut pingasut ingerlaneranni ukiumut 20 milliardi dollarinik, tassa katillugit 100 milliardi koruuninik, aningaasaliissallutik isumaqatigiipput. Afrikap nunatarsua eqqarsaatigissagaanni aningaasarpassuunngillat, qanormita iluaqutaatigisinnaappat?
Iluaqutaasinnaanerat killeqarpoq, Afrikami nunaatilinnut hundredelikkuutaanut 30-40 milliardi koruunit agguaattartussaassavaat. Tassungalu sanillersuussissagutta nunat suliffissuaqarfiusut nunaatilittatik 1300 milliardi koruunit angullugit tapiissuteqarfigisarpaat, taamaammat aningaasat taaneqartut ikitsunnguupput.
Neriorsuutitoqqat nutaamik neriorsuutigineqaqqiinnarput, siusinnerusumimi 25 milliardi dollarit Afrikami nunaatilinnut neriorsuutigineqartut piviusunngortinneqarsimanngillat. Maannali aningaasaliissutit pillugit nalunaarusiortoqarumaartoq oqartoqarmat iluaqutaassajunnarsivoq.
