Nunat Qalasersuarmut sineriallit naapipput

Issittup Imartaa pillugu ataatsimeersuarneq ullumi Ilulissani nanginneqassaaq. Ministerit tallimat – Canadameersoq, USA-meersoq, Ruslandimeersoq, Danmarkimeersoq nunatsinneersorlu – tamarmik Qalasersuarmut sineriallit Danskit nunanut allanut ministeriata isumaqatigiissutissatut siunnersuutaa oqaluuseraat.
Allattoq Louise M. Kleemann
maajip 28-at 2008 07:06

Ataatsimeeqatigiinnermi Qalasersuarmut atatillugu ataatsimoorussamik isumaqatigiissuteqarnissaq siunertarineqarpoq.

Isumaqatigiissuteqarnissami siunertarineqarpoq, Qalasersuarmut ’piginnittuunissaq’ aalajangiiffigineqartinnagu nunat ataasiakkaat qanoq pisinnaatitaaffeqarnerisa misissuiffigineqarnissaa siulliunneqarniarpoq. Maleruagassammi taamaattut Naalagaaffiit Peqatigiit Immat atorneqarnerat pillugu Isumaqatigiissutaanni allassimareermata.

Tamatuma kinguneranik Qalasersuup aaqqiagiinngissutigineqarnera 2014-ip tungaanut – uppernarsaatit saqqummiunneqarnissaasa tungaannut – uninngatikkallarneqassagunarpoq.

Siunissami isumaqatigiissutissami avatangiisinut tunngasut, Issittup imartaani isumannaatsuunissaq tamaanilu umiarsuartigut angallannissaq ilanngunneqassagunarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq