Nunat pisuunerpaat siuttui Iqalunni ataatsimiissapput
Ataatsimiinneq nunat pisuut taakku siuttuinit peqataaffigineqartartoq, Italiami ingerlanneqaqqammerpoq. Canadami naalakkersuisut konservativiusut ataatsimiinnerup Iqalunni ingerlanneqarnissaa kissaatigigaat, Canadami aviisimi National Postimi ullumikkut allaaserineqarpoq.
Canadami ministeriunerup Stephen Harperip Canadap avannarpasissuanut angalanissaata aallartinnissaa sapaatip akunnialuinik sioqqullugu tamanna nalunaarutigineqarpoq. Siorna inatsisartunut qinersinermi Stephen Harperip qineqqusaarutaata, tassa Canadap avannarpasinnerusortaani aningaasarsiornikkut ineriartortitsivimmik pilersitsisoqarnissaanik piviusunngortitsiniarnissaq angalanermi siunertarineqarpoq.
Ministeriunerup angalanerani aningaasarsiornikkut ineriartortitsiviup Iqalunni inissinneqarnissaanik nalunaaruteqarnissaa naatsorsuutigineqarpoq, naak North West Territoriarmiut suliffeqarfiup pingaarutillip taassuma illoqarfimminni Yellowknife-miinnissaa ilungersuutigisimagaluaqigaat.
Stephen Harperip Canadap avannarpasissortaanut angalanermini sakkutuut sungiusarnerat aamma najuuffigisussaavaa. Canadap avannarpasissuani sakkutooqarnerup annertusarneqarnissaa Stephen Harperip qineqqusaarnermini erseqqissartarpaa, ilaatigut nunarsuup kiatsikkiartorneranut atatillugu, Issittumi uuliamik gassimillu ujaasinermut kiisalu Sullualuup nunanit tamalaanit angallaffiulersussaanera eqqarsaatigalugit, Canadap killeqarfini nakkutigilluarnerulertariaqarmagit.
Canadap issittortaani sakkutuulersornerup annertusarnera pissutigalugu Harper Canadamiunit nuannarineqartoq alaatsinaattut oqaatigigaat National Postimi allaaserineqarpoq.
