Nunat piitsoqarfiusut annaasaqarnerunissaat ilimagineqarpoq
Nunarsuarmi eqaannerusumik niueqatigiittarnissaq isumaqatigiinniutigalugu nunat tamalaat niuernikkut suleqatigiiffianni, WTO-mi, ilaasortat isumaqatigiinniarnerat unittoortoq ippassaq oqaluttuaraarput. Ilaasortat ataatsimeeqqinnissaminnik isumaqatigiissuteqaqqaaqaratik avissaarput. Nunani tamalaani ikiuiniaqatigiiffimmi Folkekirkens Nødhjælpimi pisortaq ukiuni arlalinni isumaqatigiinniartunik malinnaasimasoq Christian Friis Bach DR-mi tusagassiortumit Rikke Bondesenimit apersorneqarpoq.
Siullermik apereqqaarusuppakkit sooq isumaqatigiissuteqartoqannginnera kikkunnit tamanik ajorineqaraluartoq unittoortoqarsimanersoq ?
- Isumaqatigiinniartut tamarmik nunaminni nunaatillit illersorniarlugit killitassaanatik isumaqatigiinniarnerit unitsippaat, Christian Friis Bach akivoq.
Nunat tamalaat niuernikkut suleqatigiiffianni siulittaasup kikkut tamaasa annaasaqarsimanerarpai. Isumaqatigiinniartulli ilaat ilaminnit annaasaqarnerussappat ?
- Nunat piitsoqarfiusut annaasaqarnerpaanissaat ilimagaara. Namminneq isumaqatigiinniarnissartik sanngiiffigaat, nunarujussuilli, soorlu Kina aamma India, namminneq niueqateqarniarlutik isumaqatigiissusiorluarsinnaapput. Nunalli piitsut minnerusut nunat tamalaat niueqatigiinnissamik isumaqatigiissutaat kiserluinnaasa isumalluutigisarpaat, taakkulu annaasaqangaatsiassasut ilimagaara. Isumaqatigiissusiortoqarsimasuuppat millionilikkuutaat pisuunnguallassinnaagaluartut aamma ilimagaara. Niueqatigiinnissamik isumaqatigiissutaaginnarani aamma eqqisseqatigiinnissamik isumaqatigiissutitut taanna taaneqarsinnaavoq. Tassami ataatsimoorussamik immitsinnut ikioqatigiilluta niueqatigiittalerutta sorsunnerit, nunat assigiinngitsut akerleriinneri kiisalu nunanut allanut qimaanerit ikilisissinnaassagaluarpagut, Folkekirkens Nødhjælpimeersoq Christian Friis Bak oqarpoq.
