Nunat NATO-mut ilaasortat inatsisartuisa ilaat Nuummut tikeraaqqammerput

Nunat Killiit Illersoqatigiiffiata NATO-p Inatsisartunut qinikkanut komitea Atlantikumut sinerialinnut tunngasunut sammisalik Nuummut ippassaq septembarip ulluisa aqqaneq-aappaanni 2013 tikeraarpoq.
Allattoq Simon Uldum -
septembarip 13-at 2013 05:41

Naalakkersuisut Siulittaasuata Aleqa Hammondip tikeraat 14-iusut kulturip illorsuani Katuami tikilluaqquai. NATO-p Inatsisartunut qinikkanut komitea Danmarkimut Nunatsinnullu angalaarpoq Issittumi Kalaallillu Nunaanni pissutsit ilisimasassarsiorfigalugit.

Naalakkersuisut  Siulittaasuata tikeraat nunatta ukiuni makkunani unammillisagassai periarfissaalu pillugit saqqummiussiffigai, pingaartumik aatsitassarsiornikkut nukissiornikkullu ineriartorneq periarfissallu sammillugit. Ilanngullugu Inatsisartut ukiakkut ataatsimiinnissaminni aalajangiiffigissaasai pingaarutillit ilaat saqqummiuppai.

Naalakkersuisut Siulittaasuat saqqumiussereermat tikeraat paaserusutaminnik apeqquteqarfigalugulu oqaloqatigaat, ilaatigut Kalaallit Nunaata nunarsuarmi qitiusumik inissisimaleriartornera, aningaasarsiornermut tunngasut, Namminersornermut namminiileriartornermut tungasut, nunasiartortunut nuttarnermullu tunngasut aammalu Kalaallit Nunaata USA-mi sinniisoqarfeqalernissaanut tunngasut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq