Nunat inoqqaavisa siunnersuisoqatigiiffiat ataatsimiilerpoq

Nunat inoqqaavisa sinniissaat nunarsuarmi tamarmeersut katillugit 2.200-t New Yorkimi katersuupput, taakkununnga ilaallutik Nunatsinni ICC-meersut Hjalmar Dahl, Martha Abelsen aamma Aqqaluk Lynge.

Canadami naggueqatigiinnit Inunneersup Dalee Sambop ukiumi kingullermi isummersoqatigiinni siulittaasuusup Nunat Inoqqaavisa atugaat Pillugit Isummersoqatigiiffiup pingaaruteqarnera erseqqissarpaa.

Tamatumuunakkummi nunat inoqqaavi nuarsuarmi tamarmeersut Naalagaaffinni Peqatigiinni sunniuteqarsinnaalermata, isumassarsianik ajornartorsiutinillu tikkuartariaqartunik Naalagaaffiit Peqatigiinnit isumagineqartariaqartunik saqqummiussisinnaalermata, Dalee Sambo Radioaviisimut oqarpoq.

Isummersoqatigiiffiup ukiormanna sammitinniagai pingaarnerit marluusut tassaapput, Inuussutissaqarnissap qulakkeerneqarnissaa - tassa nunat inoqqaavisa naammattunik inuussutissaqarnissaat qulakkeerneqartariaqarmat. Oqallisigineqartullu angisuut aappaat tassaalluni inuusuttut imminullu toquttarneq.

New Yorkimi ataatsimiinneq sapaatit akunnerinik marlunnik sivisussuseqartussaavoq.