Nunat Inoqqaavisa pisinnaatitaaffii akuersissutigineqarput
Nunat Inoqqaavisa Pisinnaatitaaffii ukiut 24-it suliarineqareersullu ullumi FN-imi akuersissutigineqarput. Nûno Isbosethsen Nivi Nielsen-ilu paasissutissiissapput:
Ullumi septemberip 13-anni FN-imi naalagaaffiit ilaasortat amerlanerussuteqarluartut nunarsuarmi nunat inoqqaavisa pisinnaatitaaffii taasinikkut akuersissutigaat.
- Ulloq tamatsinnut annertoqaaq. Taamaattumik issittormiuusugut pisinnaatitaaffiit ullumi akuersissutigineqartut nuannaarluta tigusariaqarpavut, pingaartumik minnerunngitsumillu nunap inoqqaajusugut inuiaat allat assigalugit nammineersinnaanermik pisinnaatitaaffeqaleratta, kiffaanngissuseqarluta aningaasarsiornikkut, inooqatigiinnikkut kulturikkullu Nunarsuarmioqatigiit akuerisaannik aalajangiisinnaassuseqaleratta ineriartortitsinnaalerlutalu, Nunatsinni ICC-p siulittaasua Aqqaluk Lynge oqarpoq.
Pisinnaatitaaffiit tassaapput nunarsuarmi inuit pisinnaatitaaffii pillugit maleruagassianut tulluarsakkat atuutsinneqarsinnaasullu.
- Kiisami inuiassuit oqaluttuarisaaneranni siullerpaamik Nunarsuarmioqatigiit nunat inoqqaavi inuiattut immikkuullarissuunerat inuiassuillu assigalugit naligiimmik ataqqinassuseqarnerat akuersissutigaat, Aqqaluk Lynge oqarpoq.
Pisinnaatitaaffiit ilanngullugit naqissuserpaat, nunap inoqqaavisa pisinnaatitaaffigigaat naalakkersuinikkut, inatsisitigut aningaasarsiornikkullu sukaterisinnaaneq pitsanngorsaasinnaanerlu. Tamanna isumaqarpoq, nunatsinni naggueqatigiillu Inuit nunnaanni allani, naalakkersuinikkut nammineersinnnaanerput nunallu pisuussutaannik oqartussaaffeqarnerput annertusiartortissinnaagipput aningaasarsiornikkut iluaqutissartai ilanngullugit, Aqqaluk Lynge naliliivoq.
Aningaasaqarnermut Nunanullu Allanut Naalakkersuisoq Aleqa Hammond Nunat Inoqqaavisa Pisinnaatitaaffii FN-imi akuersissutigineqarnerat pillugu oqaatigaa Kalaallit Nunaat kiisalu Danmark ikioqatigiilluarnermikkut maanna naggueqatigiit Inuit pisinnaatitaaffii piviusunngortinneqartut. New Yorkimi spaatip akunnerata tulliani Naalagaaffiit peqatigiit 62-issaannik ataatsimeersuassapput Aleqa Hammond-illu peqataanermini Mexico peqataasimaneranik immikkut qutsaviginiarpaa.
