Nunat G-7-it russit aningaasaataannik tigoqqusaanngitsunik atuinissamik isumaqatigiittut
Ruslandip nunani killerni dollarsinik 300 milliardit uningasuutitaannit erniat Ukrainemut ingerlatinneqassasut nunani G7-imi ilaassortaasut isumaqatigiissutigaat.
Dollarsit 50 milliardit (347 milliardit koruunit nalingat) Ukrainemut atukkiunneqartunut aningaasat qulakkeerinnissutaassapput.
Italiami Barimi G7-ip ataatsimeersuarnerani amerikkamiut atorfilittaat najuuttoq ilisimatitsivoq.
G7-imi nunat ilaasortaasut tassaapput USA, Canada, Japan, Tyskland, Frankrig, Italia aamma Tuluit Nunaat. 50 milliard dollarsinut kisimiilluni USA qulakkeerinnittuussasoq unnerluni præsident Joe Biden ataatsimeersuariarpoq. Nunalli allat aningaasaliinissaminnik nalunaaruteqarneri malillugit kisitsit USA-mit qulakkeerinnissutaasoq millisarneqassasoq oqaatigineqarportaaq.
Ruslandip USA-mi Europamilu aningaasaliissutaanit uninngatineqartunit dollarsinik 300 milliardinik erniaritinneqartunit pilersaarutit malillugit atukkiunneqartut utertinneqartussaapput.
Russit naalakkeruisuisa kamaatigaat USA-p Europallu dollarsinit 300 milliardinit erniaritinneqartut iluanaarutiginiarmassuk. Februaari 2022-mi Ruslandip Ukrainemik saassussinerani EU-p USA-llu aningaasat uninngatilerpaat.
Rusland akiniaaniarluni siorasaarivoq. Suliffeqarfiit nunanit kitaaneersunik suli Ruslandimiittut piginnittuulissasoq ersarissumik nalunaarutigneqartareerpoq.
Erniat assigiinngitsutigut agguaanneqarumaartut amerikamiup atorfillip ataatsimeersuarnermi najuuttup oqaatigaa. Ukrainep sakkutooqarneranut, missingersuutinut tapitut, aserortikkanik aaqqissueqqinnernut inunnullu ikiuniniarnermut allanullu ningaasat pineqartut agguaanneqassapput.
