Nunat Avannarliit suleqatigiinnerujussuusariaqaraluarput
Stoltenbergip nalunaarusiaani nunanut allanut sillimaniarnissamullu politikkerissat, annertunerusumik suleqatigiissutigisinnaasaat pillugit, assigiinngitsunik 13-inik siunnersuuteqarpoq.
Siunnersuutigisat ersarissut Danmarkimi Nunanut Allanut ministerip, Per Stig Møllerip, ullumi saqqummiinermi peqataasup, iluarisimaarlugit oqarpoq.
Nunat Avannarliit kattullutik upalungaarsimatitaqalernissaat, nunanullu pikitsitsiviusunut aallartitaqartalernissaat siunnersuutaasut ilagaat. Taakkualu saniatigut Nunat Avannarliit qarasaasiatigut ajortumeerneqarsinnaanerat pinngitsoorniarlugu, illersornissamut suleqatigiinnik pilersitsinissaq siunnersuutigineqarpoq.
Nunatsinnulli pingaaruteqartut ilagaat issittumi ajunaartoqalertillugu ikiuisussanik ataatsimut upalungaarsimatitaqarnissaq pillugu siunnersuut. Tassunga tunngatillugu Nunanut Allanut ministeri, Per Stig Møller, oqarpoq, suut tamarmik akitsoriartortillugit nunat avannarliit tamarmik immikkut, soorlu sikumik aserorterutinik umiarsuaateqartariaqanngitsut, naammattunilli atorfissaqalertillugit atorsinnaasanik ataatsimut peqartoqarsinnaasoq.
Thorvald Stoltenberg saqqummiussinermini aamma oqarpoq, suut tamarmik akitsoriartornerat aallaavigalugu, Nunat Avannarliit ataatsimut sakkutuut atortuinik pisiortorsinnaasut, namminerlu takorloorsinnaallugu ukiut 15-iinnaat qaangiuppata Tyskland, Frankrig, Tuluit Nunaat Ruslandilu kisimik immikkut sakkutooqarlutik atortuuteqarsinnaassasut.
Danmarkimi illuatungiliuttut aamma isumaqataapput. Socialdemokratit sillimaniarneq pillugu oqaaseqartartuat, Jeppe Kofoed, oqarpoq, siunnersuutit iluarisimaarluarlugit, soorlu Sullualuk angallaffigineqarlualerpat ataatsimut annaassiniarsinnaasunik upalungaarsimatitaqalernissaq Nunat Avannarliit suleqatigiillutik qulakkeerniartariaqaraat.
