Nunat Avannarliit Siunnersuisoqatigiivisa nersornaasiuttagaat ullumi agguaanneqalersut
Immikkoortumi nunani avannarlerni atuakkiortut, atuakkiortoq Sørine Steenholdt 2015-imi oqaluttualiaaqqanik atuakkiani "Zombiet Nunaat" pillugu nersornaasigassatut innersuunneqarpoq.
Boletta Silis-Høegh immikkoortumi nunani avannarlerni meeqqat atuakkiat pitsaanerpaat, atuakkiani 2014-imeersoq "Aima qaa schhh!” pillugu nersornaasigassatut innersuunneqarpoq.
Kiisalu nipilersoqatigiit Uyarakq aamma Peand-eL saqqummersitartik “Kunngiitsuuffik” pillugu nunat avannarliit nipilersortartunut nersornaasiuttagaannut innersuunneqarput.
Nersornaasiineq DR-ip Københavnimi Tusarnaartitsisarfissuani ullumi, nunatsinni nalunaaqutaq malillugu, nal. 16.00 pissaaq nersornaaserneqartullu tamarmik immikkut 350.000 koruuninik akissarsitinneqassapput.
Nersornaasiineq Nunat Avannarliit Ministerinut Siunnersuisoqatigiiffiata Københavnimi ullumi marlunngornermi 68-issaannik ataatsimiinnerat aallarnerlugu pissaaq. Ministerit politikerillu nunanit avannarlerneersut, Nunatsinneersut Savalimmiuneersullu Naalagaaffiit Peqatigiit nunarsuarmi 2030-mut anguniagaat oqaluuserissavaat.
