Nunat Avannarliit Siunnersuisoqatigiivi naapipput
Kim Kielsen, Siumut, Avatangiisinut Pinngortitamilu pisuussutinut ataatsimiititaliamit, Debora Kleistilu, IA, Atugarissaarnermut ataatsimiititaliamit, peqataapput.
Nunani avannarlerni Avatangiisinut Pinngortitamilu pisuussutinut ataatsimiititaliami Kim Kielsen, Siumut, immikkut peqataavoq.
Nunani avannarlerni silap pissusaa nukissiuuteqarnerlu pillugit suleqatigiinnerup, minnerunngitsumillu Issittumi imaatigut angallannermi isumannaallisaanerup sammineqarnerulernissaa peqataanerminut qitiutippai.
Nunat avannarliit suleqatigiinnerat aqqutigalugu Issittumi angallannerup malittarisassiorneqarnissaa pingaaruteqartoq, Kim Kielsen oqarpoq.
Parteeqatigiikkuutaarluni ataatsimiititalianilu ataatsimiittarnerit aaqqissuussinerillu allat saniatigut nunani namminersorfiusuni Kalaallit Nunaanni, Ålandimi Savalimmiunilu naalakkersuinermik suliallit akornanni ataatsimeeqatigiinnermi Kim Kielsen aamma Debora Kleist peqataapput.
Suleqatigiinnerup tamatuma suleqatigiinnissamut isumaqatigiissummik atsiukkamik naqissuserneqarnissaa siunertarineqarpoq.
Nunat Avannarliit Siunnersuisooqatigiivi aappaagu naapeqqikkunik Nunani Avannarlerni nalinginnaasumik isumaginninnermik siunertanut inissialiortiterneq oqaluuserissavaat.
