Nunat avannarliit siunnersuisoqatigiivi ataatsimiipput
Nunat avannarliit siunnersuisoqatigiivisa ullumi aallartittumik novembarip aappaat ilanngullugu ukiumoortumik ataatsimeeqatigiinnerminni nunat namminersornerulersimasut siunissaat pingaartumik oqaluuserissavaat.
Nunat avannarliit siunnersuisoqatigiiffianni danskit aallartitaannut Nunarput Savalimmiullu ilaapput Ålandimiullu Finlandimiut aallartitaannut ilaallutik.
Nunatta Savalimiut Ålandimiullu nunat avannarliit allat naligalugit immikkut tamarmik aallartitaqartalernissaat eqqartorneqassaaq.
Savalimmiormiut kisimik immikkut sinniisoqartitsinissamik maannamut qinnuteqarsimapput.
Inatsisartut sapaatip akunnerani kingullermi isumaqatigiipput nunat namminersornerulersimasut siunnersuisoqatigiinni nukittunerusumik inissisimalernissaat pillugu suliniarneq tapersorneqartariaqartoq.
Inatsisartuni ilaasortat Siumumeersoq Kim Kielsen aamma Inuit Ataqatigiinneersoq Johan Lund Olsen Nunat avannarliit siunnersuisoqatigiivisa ataatsimiinneranni peqataassapput.
