Nunat avannarliit oqalorujunneqarput
Islandimi namminersorniat partiaanni siulittaasup Bjarni Benediktssonip, Nunat Avannarliit Siunnersuisoqatigiivisa ataatsimiinneranni ippassaq oqalugiarnermini, nunat avannarliit sakkortuumik oqalorujuppai.
Allattoq Louise M. Kleemann
oktobarip 28-at 2009 13:05
Islandip aningaasarsiornikkut ajornartorsiuleruttorfiani nunat avannaamioqatigiit tapersersuinatillu ikiuinnginnerat, oqalugiarnermini sakkortuumik uparuarpaa.
- Islandi pisariaqartitsiffimmini sumiginnagaavoq, Bjarni Benediktsson oqarpoq, bankillu Islandimiunit pigineqartup ”Icesave”-p siorna akiliisinnaajunnaarnera assersuutigalugu.
Banki taanna akiliisinnaajunnaarmat, aningaasaatillit Tuluit Nunaanneersut Hollandimeersullu nunanit avannarlernit tapersersorneqartut , Bjarni Benediktssonip taakkartorpaa.
Taanna isumaqarpoq eqqartuussisulersuussinissamut pisinnaatitaaffeqarneq nunat avannarliit akornanni tunniutiinnarneqarnavianngitsoq, soorlu Icesavemut tunngatillugu Islandi taamaaliortariaqarsimasoq, Morgunbladid allappoq.
