Nunat Avannarliit nunanut allanut ministerii ataatsimiissapput
Nunani issittuni nunanut allanut ministerit, qaammatit pingasut qaangiuppata Norgip avannaani illoqarfimmi Tromsømi ataatsimiilerpata ilisimatusariaaseq nutaaq atorlugu paasisat, tassa silap kissassusaata allanngorialaarnerata kinguneranik Nunatsinni sermersuup aakkiartornerulerneranik kinguneqartut saqqummiunneqarumaarput.
Ilisimatuussutsikkut misissuisut nunanit tamalaaneersut nalunaarusiartik, Issittumi siunnersuisoqatigiinnut saqqummiunneqartussaq suli naammassinngilaat. Siunnersuisoqatigiinnut ilaasortaapput Nunat Avannarliit, Rusland, Canada aamma USA.
Taamaattorli Norgip nunanut allanut ministeriata, Jonas Gahr Størep arlaleriarluni oqaatigisareerpaa, Norgip Issittumi Siunnersuisoqatigiinni siulittaasuunini naggataarlugu, Københavnimi Naalagaaffiit Peqatigiit silap pissusaa pillugu decembarimi ataatsimeersuartitsineranni sakkortuumik nalunaaruteqarniartoq.
Nutaarsiassaqartitsiviup NTB-p maluginiarpaa nunani avannarlerni ministerit apriilip 28-anni ataatsimiinnissaat sioqqullugu, nunanut allanut ministerit silap pissusaa pillugu ataatsimiitinneqarnissaat, Norgimi naalakkersuisut sulissutigigaat.
Nalunaarusiami nutaami ilisimatuussutsikkut misissuisut oqaatigaat, Nunatta imartaani immap kissarnerulersimanera. Tamanna annertunngikkaluarpoq, taamaattorli sermersuup alliartortarnera ukiup ilarujussuani pisarunnaarsimavoq, taamalu sermit iigartartut naqqaniit aakkiartulersimallutik.
