Nunat avannarliit naatsorsueqqissaartarfii saqqummersitsipput

Nunat avannarliit tallimat, tassaasut Danmark, Finland, Island, Norge Sverigelu kiisalu nunat namminersortut pingasut, tassaasut Kalaallit Nunaat, Savalimmiut Ålandilu, saqqummersitami imminnut assersuunneqarput.

Kalaallit Nunaanni innuttaasut nunani avannarlerni innuuttasunut allanut sanilliullugit inuusunnerusut saqqummersitami ilaatigut atuarneqarsinnaavoq, tassa innuttaasut ukiuisa agguaqatigiissinerat 34-iugami. Aamma peqqinnissamik isumaginninnermut aningaasartuutit innuttaasunut ataasiakkaanut agguaqatigiissinnerat, Kalaallit Nunaanni appasinneruvoq.

Niuerneq qiviassagaanni avammut tunisat 90 procentii alisarnerminngaanneersuupput. Aamma Kalaallit Nunaanni nioqqutissanik atuineq nunanut avannarlernut sanilliullugu akisunerup tulliatut inissisimavoq, Island akisunerulluni.

Paasissutissat tamakku Nunani avannarlerni naatsorsueqqissartarfiit saqqummersitaanni nutaami atuarneqarsinnaasut ilagaat. Aamma Kalaallit Nunaanni kræftimik nappaateqarlutik toqusartut amerlanerunerat, naartuersinnerillu erninernit amerlanerunerat, kisitsisit alianarnerusut takutippaat.

Kiisalu ateq Lucas, nunani avannarlerni tamani nuannarineqarnerpaatut inissisimasoq aamma atuarneqarsinnaavoq, tassami Danmarkimi, Norgemi, Sverigemilu 2008-mi nuannarineqarpaagami.

Saqqummersitami nunat namminersortutut inissisimasut pillugit paasissutissat tamakkiisut ilaatinneqanngillat.