Nunat avannarliit naalagaaffeqatigiilernavianngillat
Dronning Margrethe nunanut avannarlernut dronninnginngornavianngilaq aamma nunat avannarliit naalagaaffimmut ataatsimut kattunneqarnavianngillat, siunnersuut oqaluttuarisaanermik ilisimatuumit svenskimit Gunnar Wetterbergimit saqqummiunneqartoq, nunat avannarliit ministeriunerinit itigartitsissutigineqarpoq.
Allattoq Bikki P. Kleist
Nunat avannarliit tallimaasut kattunerisigut naalagaaffik nunat pisuut qulit akornannut inississagaluartoq, Gunnar Wetterbergip oqaatigaa.
Ministeriunerit siunnersuummik itigartitsinerat tusagassiortunik katersortitsinermi ullumi saqqummiunneqarpoq.
- Nunat avannarliit akornanni suleqatigiinneq nukittuujuvoq aamma silap pissusaata allanngoriartornerata kingunerumaangassai unammillernartut, soorlu avatangiisinut nukissiornermullu tunngassuteqartut, piareersimaffigilluarpavut, nunat avannarliit siunnersuisoqatigiivinit oqaatigineqarpoq.