Nunat Avannarliit Killiit suleqatigiinnerusariaqarput

Siunnersuutissai tamarmik Nunat Avannarliit Killiit Siunnersoqatigiiffiannit kaammattuutigineqarput, ataasiinnarli Inatsisartunit siumut akuerineqartussatut innersuussutaareerpoq, tassa immikkut issittumi arnanut atugassarititaasut, inuillu pisinnaatitaaffii pillugit ilinniusiortoqarnissaanik siunnersuut. Siunnersuutip siunertaraa inuusuttut ilinniartitaaneranni naligiissitaanerup oqallisigineqarnissaa.

Atlantikup avannaani isumannaallisaaneq pillugu, immikkut annaassiniartarneq eqqarssaatigalugu suleqatigiinnerulernissamut kaammattuut, Danskit naalagaaffiannut ingerlateqqinneqarpoq, tassa naalagaaffiup annaassiniarnermut aningaasartuutit akilertarmagit.

Ilisimatuut misissuinerminnut tunngatillugu suleqatigiinnerulernissaannik siunnersuut Inatsisartut aalisarnermut ataatsimiititaliaannit itigartineqarpoq, Pinngortitaleriffik Nunani Avannarlerni Killerni aalisakkanik misissuineq misilittaanerlu pillugit suleqateqareermat.

Siunnersuutit Savalimmiuni Islandimilu Naalakkersuisut aamma isummerfigisussaavaat.