Nunat Avannarliit Killermiut Savalimiuni ataatsimiissapput

Nunat Avannarliit Killermiut, tassa norgemiut svenskillu, inatsisartunut ilaasortat atorfillillu 35-t missaanniittut Savalimmiuni Runavikimi Tórshavnimilu sapaatip akunnerata tulliani ataatsimeeqqatigiilerpata ilinniarneq, EU silallu pissusaa oqaluuserineqassapput, tassami Nunani Avannarlerni Killerni ilungersuussat ataatsimiinnermi eqqartorneqartussaapput. Nunat Avannarliit Killiit Siunnersuisoqatigiivi ukiumoortumik sapaatip akunnerani tullermi ataatsimiissapput.
aggustip 21-at 2009 11:57

Ilinniarneq pillugu suleqatigiinneq oqaluuserisassat pingaarnerit ilagaat.

- Nunani Avannarlerni højskoleqalernissaq pisariaqartikkatsigu Nunat Avannarliit ministeriisa aalajangersaasartui Nunanilu Avannarlerni ilinniartitsinermut ministerit ukiut marluk sinnilaarlugit kimigiiserfigisimavavut, Nunat Avannarliit Killiit Siunnersuisoqatigiivini siulittaasoq, Savalimmiunilu Lagtingimi ilaasortaq, Kári P. Højgaard oqarpoq.

EU oqaluuserisassanut aamma ilaavoq. Nunat Avannarliit Killiit Siunnersuisoqatigiiffiata siulittaasoqatigiivi EU-milu inatsisartut paasissutisseeqatigiillutik ukiumoortumik aamma ataatsimiittussaapput, Siunnersuisoqatigiillu tassani aalajangissavaat soqutigisat sammisallu suut unionimut apeqqutigineqassanersut. Puisit amiinik sanalukkanillu EU-mut eqqusseqqusiunnaarnissaq siorna oqallisigineqarmat ataatsimiinneq iluatsippallaanngilaq.

Silap kiatsikkiartornera Issittumilu silap pissusaata allanngoriartornera aamma oqallisigineqassapput. Umiarsuit aqqutigisinnaaligassaat, aatsitassarsiornissamut periarfissat, annaassiniarnerit allarpassuillu ataatsimiinnermi paasiniaqqissaarneqassapput.

Nunat Avannarliit Killiit ukiumoortumik ataatsimiinnerat aggustip ulluisa 25-anniit 27-ata tungaanut pissaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq