Nunat Avannarliit Island EU-mut ilaasortanngortikkusuppaat
Nunat Aavannarliit ministeriunerisa persuarsiornanngitsumik Islandimi ullumi ataatsimiinneranni tamanna oqaatigineqarpoq. Ataatsimiinnermi tassani Islandip ministeriunertaavata Jóhanna Sigurdardóttir-ip Nunani Avannarlerni ministeriuneqatini EU-mut ilaasortanngorniarnermut siunnersoqqulluni tapersersoqqullunilu qinnuigai. Sapaatip akunneri arlaqanngitsut qaangiuppata EU-mi siulittaasoqarfik Sverigemit tiguneqassaaq, Sverigemilu ministeriunerup Fredrik Reinfeldtip oqaatigaa Islandip qinnuteqaataa tapersersorlugu, sukkanerpaamillu oqaluuserineqarnissaa sulissutiginiarlugu. Danmarkip ministeriunerata Lars Løkke Rasmussenip aamma Islandip ilaasortanngornissaanut ikiuunnissani piareersimaffiginerarpaa.
Islandip EU-mut ilaasortanngornissaa pingaaruteqartoq Jóhanna Siguardardóttir-ip oqaatigaa.
- EU-mut ilaasortanngornissamik qinnuteqarnitta kinguneranik, Islandip aningaasaqarnerata aalaakkaanerulerneranik kinguneqassaaq. Taamaattorli Islandip ilaasortanngorniarneranut piffissaq sivisooq suli ingerlasinnaavoq.
- Piffissaq sivisussaaq. Ilaasortanngorsinnaaneq immaqa suli ukiut marluk pingasulluunniit aatsaat qaangiuppata piviusunngorsinnaassaaq, Jóhanna Siguardardóttir oqarpoq.
Tamatumunnga ilanngullugu Island EU-mut ilaasortanngussagaluarpalluunniit nunani avannarlerni suleqatigiinnerup ingerlatiinnarnissaa pingaaruteqartoq taassuma oqaatigaa.
