Nunat Avannarliit ilinniakkatigut unammillernerulerniarput

Ilinniartitaanikkut suleqatigiinnerunissaq pillugu Master-programi neqeroorutigineqassaaq, nunallu ikinnerpaamik pingasut ilinniarfiisa akornanni suleqatigiinnissaq siunertaassalluni.

Universitetit Nunani Avannarlerniittut neqeroorutissaat ilinniarusuttunut neqeroorutigineqassapput. Nunat Avannarliit Siunnersoqatigiivisa nittartagaanni tamanna atuarneqarsinnaavoq.

- Nunani Avannarlerni ilinniarfeqarfiit suleqatigiinnerisigut Nordic Master Programip unammillersinnaassusia naqissuserneqassaaq, ilisimasat Nunani Avannarlernit pisut unammillersinnaassusiat takutinniarneqassalluni, Siunnersuisoqatigiit allapput.

Ilinniakkat assigiinngitsut arfinillit tamarmik immikkut 1 millioni koruuninik aningaasaliiffigineqarsinnaassapput, ilinniakkami masteri anguneqarsinnaassalluni.