Nunasisussat oqaatsinik misilitsittaleqquai

Nunatsinni nunaqavissunngorniaraanni suliniaraannilu nunanilu avannarlerneersuunani kalaallit oqaasii ilinniarneqartariaqarput. Inatsisartuni ilaasortaq Siumumeersoq Akitsinnguaq Olsen taama isumaqarpoq. Taanna Inatsisartut ukiaanerani ataatsimiinnissaanni oqallissaarilluni apeqquteqaateqarpoq.

Aatsitassanik ikummatissanillu pilersaarutit piviusunngortinneqarnissaanni sulisut avataaneersut ilaat nunatsinniiginnarnissaat natsorsuutigineqarsinnaavoq, taamaammallu inuiaqatigiinnut akuutilerniarlugit kalaallit oqaasiinik pinngitsooratik ilinniartinneqartariaqartut, Akitsinnguaq Olsen isumaqarpoq.

Siunnersuutip imaraa Nunatsinnut suliartorusullutik qinnuteqartut nunallu avannarliit oqaatsit pillugit isumaqatigiissutaannut ilaanngitsut kalaallisut ilinniartinneqartassasut. Nunat avannarliit isumaqatigiissutaata imaraa, nunani avannarlerni arlanniikkaluaraanniluunniit nammineq oqaatsit atorneqarsinnaasut.

Siunnersuutip imaraa sulisut ukiut pingasut ingerlanerini kalaallisut ilinniartinneqartassasut, ukiullu pingasut qaangiuppata misilitsissasut pingasoriarlutillu angusinngitsoorunik nunatsinniinnissaminnut itigartinneqartassasut.

Kisianni ilinniartitsinermi arlaannik allanngortoqanngippat siunnersuut piviusunngortinneqarsinnaanngitsoq, Oqaasileriffimmi siunnersorti Per Langgård isumaqarpoq.

-   Ilinniartitsisussat, atortussat inissallu naammanngillat. Siunnersuut piviusunngortinneqarsinnaasoq isumaqarpunga. Kisianni isumaqartoqarpat, akeqanngitsumik imaluunnit ajornannginaaraluni piviusunngortittariaannaasoq, taava kukkunerujussuuvoq. Atortut nutaat ilinniartitseriaatsillu nutaat piviusunngortinneqaqqaartariaqarput.

Akitsinnguaq Olsen oqarmat, nunani allaniit tikittut oqaatsinik ilinniartinneqarunik inuiaqatigiinnut akuulerulernissartik ajornannginnerulertissagaat, Per Langgårdip isumaqatigaa.

- Inuunerat nuannernerussaaq kalaallinullu iluaqutaalluni, Per Langgård isumaqarpoq.

- Kalaaliunngitsut qallunaajunngitsullu kalaallisut ilinniartinneqarsinnaaleraluarunik tamatsinnut iluaqutaassaaq. Avataaneersut nuannernerusumik inuunerat nuannernerussaaq kalaallinullu iluaqutaalluni, Per Langgård oqarpoq.

Akitsinnguaq Olsenip apeqquteqaataa Inatsisartut ukiaanerani ataatsimiinneranni eqqartorneqassaaq, taannalu pissaaq novembarip 14-iani.