Nunasiaataasimaneq pillugu isiginnaagassiaq iluatsilluartoq

Isiginnaagassiaq Jappa tassaavoq Nunatta Isiginnaartitsisarfiata isiginnaagassiaq ”Jeppe på Bjerget” aallaavigalugu isiginnaagassiaa quianartuliaq.

Jappa isiginnaarianit nunnarineqarsimaqaaq. Tallimanngormat takutinneqaqqaarneranit arfininngorneq sapaallu ilanngullugit 300-ut sinnerlugit isiginnaariarsimapput. Taakkulu sioqqullugit piareersaatitut Frelsens Hærimiit, Kofods skolemiit ilaatigullu Piareersarfimmiit isiginnaartitsissutigineqarsimalluni.

Isiginnaartitsinerit iluatsilluarsimaqisut Manasse Berthelsenip, Nunatta Isiginnaartitsisarfiani isiginnaagassiornermi aqutsisup, KNR-imut oqaatigaa.

- Nuannarineqaqaaq. Isiginnaariat illartaqaat. Taamaammat quisaarusiaanera iluatsilluartutut oqaatigisariaqarpoq, Manasse Berthelsen oqarpoq.

Taassuma aamma oqaatigaa isiginnaagassiaq tupannalaarsinnaasunik imaqartoq, taamaammallu isiginnaartut qulileereersimanissaat aalajangiunneqarsimasoq. 

Isiginnaagassiaq Jappa pingasunngorpat Qaqortumi isiginnaartitsissutigineqassaaq kingornalu sinerissami illoqarfiit ilaanni aamma takutinneqassalluni.