Nunarsuup silaannaa aatsaat taama kissatsigaaq

Silasiornikkut uuttortaanerit nutaaliat 1850-ip missaani aallartinneqarput, nalunaarusiarlu malillugu taamaniilli ukiut qulikkuutaat 2001-2010 kiannerpaaffiupput. Nunarsuup silaannaa agguaqatigiissillugu 14.47 gradinik kiappoq, piffissamut 1961-imit 1990-imut gradimik ataatsimik kiannerulluni.

Ukiuni qulikkuutaani taakkunani ukiut qulingiluat kiannerpaaffiusut ilagaat, 2010-lu kiannerpaaffiulluni.

Kalaallit Nunaalli kissakkiartornerpaatut rekordiliisuuvoq. Kalaallit Nunaannimi silaannaap kiassusaa ukiuni qulikkuutaani kingullerni siornatigumut naleqqiullugu 1.71 gradinik qaffasinneruvoq.

Danmarkimi Silap pissusaanik ilisimatusarfimmi ilisimatuut pisortaat, Jess Hesselbjerg, oqaloqatigaarput, taassumalu silaannaap kissatsikkiartornerata Nunatta silaanut qanoq sunniuteqassanersoq oqaluttuarisinnaavaa.

Ajoraluartumilli seqinnernerulernissaanik aasaanerunissaanillu neriorsuuteqanngilaq.

- Silaannaap kissatsikkiartornera ilutigalugu siallernerullunilu nittaannerulissaaq. Imaanngitsoq ulluni amerlanerusuni siallerlunilu nittaattalissasoq. Siallertarnerili nittaattarnerilu ataasiakkaat siornatigumut naleqqiullugit imermik imaqarnerussapput. Taamaammat kissatsikkiartuinnartussatut, siallernerulertussatut nittaannerulertussatullu isikkoqarpoq, ilisimatuut pisortaat Jens Hesselbjerg nassuiaavoq.