Nunarsuatsinni sivisunerpaamik matoqqareerluni Melbourne ammaqqippoq
Sisamanngornerup tallimanngornerullu akornanni unnuap qeqqanut, Australiami illoqarfissuarmi Melbourne-mi corona pillugu matoqqatitsinerup sivisoqisup qaangiunnera persuarsiutigineqarpoq.
Australiami illoqarfiit annersaasa tulliat, Melbourne, 2020-mili martsimiit arfinileriarluni killilersuisoqartarnerani, katillugit qaammatini qulingiluani – ulluni 262-ini - matoqqanikuuvoq.
Taamaalilluni illoqarfik taanna nunarsuatsinni sivisunerpaamik matoqqanikuuvoq.
Tamanik matoqqatitsinermi Argentinami illoqarfik, Buenos Aires-ip, katillugit ulluni 234-ni matoqqasimasoq taamaalilluni qaangerneqarpoq.
Taamaammallu tamanik ammaaqqinneq Melbourne-mi persuarsiutigineqarpoq, ullaaralaamiillu inuit imerniartarfinnut, sutorniartarfinnut nujaleriffinnullu aggiallutik.
Tamakkua saniatigut inuit altaniminniit ersaattaallutillu nilliarrattut uniffeqanngitsumik aamma biilit nilliatitsipput.
- Siggartaatinik nilliatitsisut inuillu nilliarrattut tusaallugit pikkunaqaaq, Melbourne-mi borgmesteri, Sally Capp, Australian Broadcasting Corporation-imut (ABC) oqarpoq.
Killilersuinerit maanna qasuterneqartut aggustilli aallartinnerani atuutsinneqarnikuupput.
Illoqarfimmi ammaaqqinnermi sutorniartarfiit iluanni 20-nik isersimasoqaqqusaavoq silataannilu 50-inik issiasoqaqqusaalluni. Tamakkununnga takkussuuttut tamarmik akiuussutissamik kapitissimasussaapput.
Angerlarsimaffinni inuit qulit tikillugit katersuussinnaatitaapput. Sumi tamani suli qanermut assiaqutit atorneqartussaapput.
Australiami naalakkersuisut periusissaminnik pilersaarutiminni sapinngisamik tunillatsittoqannginnissaanik anguniagallit, coronap allannguutaanik Delta-mik unammillerneqarput.
Nunami innuttaasut 70 procentii naammassillutik akiuussutissamik kapitereerput.