Nunarsuatsinni sakkuuteqarnerulerusuttut amerliartuinnarput.

Eqqissinissaq pillugu Svenskit ilisimatusarfiata, SIPRI-p nalunaarusiaa ullumi saqqummerpoq.

Nunarsuatsinni naalagaaffiit sakkunut aningaasartuutaat 2006-imut sanilliullugit 2007-imi 6 procentimik qaffariarput. Naalagaaffik sakkutooqarnermut 547 milliardi dollarsinik aningaasartuuteqarluni, sorsunnersuup kingulliup kingorna sakkunut aningaasartuuteqarnerpaaq tassaavoq USA. Sakkunut aningaasartuutit 5 procentiat tikillugu aningaasartuuteqarlutik, aningaasartuuteqarnerpaanut tulliupput Tuluit Nunaat, Kina, Frankrigi Japanilu. Russit uuliamik aningaasarsiuteqarluartut aamma 2007-imi sakkunut aningaasartuutaat 2006-imi aningaasartuutaannit amerlanerupput. Russilli naalagaaffiit sakkunut aningaasartuuteqarnerpaat arfineq-aappaattut inissisimapput. Nunarsuatsinni sakkuliorfiit annersaasa hunnorujut, naalagaaffiit sakkunut aningaasartuuteqarnerulernerat malugivaat. Ukioq 2006-imi taamaalillutik 8 procenti tikillugu isertitaqarnerusimallutik. Sakkuliorfiit annerit hunnorujut affaasa missaat amerikamiut suliffiutigaat. Eqqissinissaq pillugu ilisimatusarfimmi, SIPRI-mi sooq naalagaaffiit sakkunut aningaasartuuteqarnerulernerat eqqoriarpaat; Naalagaaffiit ilaasa nunarsuatsinni sumiiffiit ilaanni pissaaneqalerusunnerat, sumiiffinni assigiinngitsuni pikitsitsisoqaqqajaanera pikitsitsisoqalereerneralu, kiisalu naalagaafippassuit sakkunut atorsinnaasaminnik aningaasaateqarnerulersimanerat pissutaasutut eqqoriarpaat.