Nunarsuarput annaanniarlugu qimmimik nerigit!
Illussanik titartaasartut taakkua naatsorsuinerminni paasivaat, qimmeq angivallaaranilu mikivallaanngitsoq, biilimit assakaasumigut sisamanik nutsuisulimmit, avatangiisinik marloriaammik mingutsitsinerusartoq.
Atuakkiortut taakku marluk naatsorsuinerminni aallaavigisimavaat, uumasuutigisaq nerisassaqartinniarlugu nuna qanoq annertutigisoq naggorissarneqassanersoq aamma biilingaatsiarsuarmik benziinartortorujussuarmik biililiorlutik.
Qimmip angivallaanngitsup ukiumut agguaqatigiissillugu neqi 164 kiilut karrinillu nerisassiat 95 kiilut nerisarpai. Qimmeq nerisassaqartinniarlugu nuna 0,84 hektaritut annertutigisoq naatitsivigineqartariaqarpoq. Qimmeq angisooq, soorlu schäfferi nerisassaqartinniarlugu nuna 1,1 hektari naatitsivigineqartariaqarpoq.
Biili angisooq Land Cruiser 4,6 liiterimik motoorilik, affaannarmik pisariaqartitsivoq, tassa 0,41 hektarimik. Taamaattumik atuakkiortut taakku marluk isumaqarput qimmeqarani biilerujussuaqaraanni, tamanna silap pissusaanut iluaqutaanerussasoq, Danmarks Radiup nittartagaani allaaserineqarpoq.
