Nunarsuarmiut malinnaalerput

Ilisimatuussutsikkut aallakaatitassiami, Viden Om-imi tusagassiortoq, Jan Haugaard, Kalaallit Nunaanni immap naqqani uuliamik qillerilluni ujaasineq aallaqqaataaniik malinnaaffigaa. Taanna isumaqarpoq olia Kalaallit Nunaannut iluaqutaalluarumaartoq.

- Qillerinerit iluatsilluarsimasutut isikkoqarput. Pissangasimaqaagut arlaannik pisoqassanasoralugu - tassami ajortoqarnissaa kissaatigisimanngeqigatsigu. Maannali iluatsippoq, tamannali oqaluttuarisaanermut ilaavoq. Siullermik soqutigaarput uuliasiorneq isumannaatsumik ingerlasinnaassasoq - isumaqarpugullu isumannaatsumik ingerlanneqarumaartoq. Ullumimiik Kalaallit Nunaat qangatavoq. Issittumi qanoq uuliaqartigineranik misissuisarnerit malillugit uuliaqarluartoq ilisimaneqarpoq. Maannakkullu uuliamik nassaarfiusumi uuliamik annertoorujussuarmik peqarpoq, taama oqarpoq Jan Haugaard.

Jan Haugaard isumaqarpoq qallunaat aamma nunani allani tusagassiortut Kalaallit Nunaata ineriartornera qanimut malinnaaffigilluarumaaraat.

- Qallunaat Nunaannit isigalugu soqutiginaataa tassaavoq Kangilinnguit Grønlands Kommandolu ajutoornermik pisoqassagaluarpat annerpaamik akisussaaffeqarmata. Taamaattmik qularutigineqassanngilaq qanimut pisut tamaasa malinnaaffigilluarumaaratsigit - uaguinnaanngitsorli nunarsuarli tamarmi malinnaajumaarpoq. Uuliamik nassaarnermik nutaarsiassaq angisoorujussuuvoq. Nunarsuami tusagassiorfiit soqutigissuaat paasissallugu uuliasiorneq ilumut Kalaallit Nunaata pitsaasumik ingerlassinnaassaneraa. Uagullu piffissami aggersumi inuiaqatigiit akornaani ineriartorneq malinnaaffigissavarput, soorlu suliffiit nutaat pilersinneqassappata aningaasallu Kalaallit Nunaannut isertussat pillugit. Piffissami sivisuumi tamakku soqutigalugit malinnaaffigissavagut, taama oqarpoq Jan Haugaard.